جنوبی وزیرستان کے علاقے شکئی کے مرکزی بازار سے نقاب پوش مسلح افراد نے اسلحے کے زور پر دو مقامی تاجروں کو یرغمال بنایا اور اپنے ساتھ اٹھا کر لے گئے۔
واقعہ شکئی تھانے کی حدود میں پیش آیا جہاں سے مرغی کا کاروبار کرنے والے خان اور آٹے کی دکان چلانے والے عصمت اللہ کو اغواء کیا گیا، جو دونوں مقامی رہائشی ہیں۔
اطلاع ملتے ہی پولیس اور سیکیورٹی فورسز کی ٹیموں نے جائے وقوعہ پر پہنچ کر شواہد اکٹھے کیے اور ملزمان کی تلاش شروع کر دی۔
مقامی انتظامیہ کا کہنا ہے کہ مغویوں کی جلد اور باحفاظت بازیابی کو یقینی بنانے کے لیے تمام تر اقدامات کیے جا رہے ہیں۔
واقعے کے بعد علاقے کے تاجروں اور عام شہریوں میں شدید تشویش پھیل گئی ہے جبکہ اہل خانہ کے مطابق مغویوں کی کسی سے کوئی ذاتی دشمنی نہیں تھی۔
فی الحال کسی بھی گروہ کی جانب سے اس اغواء کی ذمہ داری قبول کرنے کا اعلان سامنے نہیں آیا ہے۔
.jpeg)
